૫૨ વર્ષિય પી.બી. ગઢવી મૂળ મોરબીના હળવદના વતની છે અને ૨૦૦૮માં સીધા પીએસઆઈની ડાયરેક્ટ ભરતીથી ખાતામાં જોડાયાં હતાં. ૮ વર્ષ અગાઉ તેમને ઈન્સ્પેક્ટર તરીકે પ્રમોશન મળેલું.

કચ્છખબર સાથે વાત કરતાં પીઆઈ ગઢવીએ જણાવ્યું કે તેમણે અત્યારસુધીમાં ભરુચ, વડોદરા, ગાંધીનગર, દ્વારકા, મોરબી, જામનગર સહિતના જિલ્લાઓમાં ફરજ બજાવેલી છે. પશ્ચિમ કચ્છ પોલીસ દળમાં છેલ્લાં બે વર્ષ દરમિયાન તેમણે પ્રાગપર, નલિયા અને હાલ માધાપરમાં ફરજ બજાવે છે.

સંતવાણી અને ભજન માટે જાણીતા ગુજરાતના લગભગ મોટાભાગના ગાયકો સાથે તેમણે સૂર સંગત કરેલી છે. તેમનો પ્રિય રાગ માઢ છે અને ભૂતકાળમાં મોરારિબાપુથી લઈ માયાભાઈ આહીર સહિતના જાણીતા લોકો તેમની સૂર સાધક તરીકે જાહેર પ્રશંસા કરી ચૂક્યાં છે.

ગાંધીનગરની ડ્યુટી સમયે થયેલો એક અનુભવ શૅર કરતાં તેમણે જણાવ્યું કે હળવદની ભજન મંડળી ગાંધીનગર આવેલી અને તેમને ઓળખતાં લોકોએ તેમને ભજન ગાવાનું ઈજન આપેલું. સાહેબ તો ભજન લલકારવા માંડેલાં ને ત્યાં અચાનક પોલીસની એન્ટ્રી થયેલી. સમયમર્યાદાના નામે ભજન બંધ કરાવવા આવેલો એક જમાદાર સીધો સ્ટેજ પર આવી ગયેલો પણ પોતાના જ પોલીસ સ્ટેશનના પીઆઈ સાહેબને ભજન લલકારતાં જોઈને બઘવાઈ ગયેલો!

આમ તો મલાઈદાર ગણાતાં પોલીસ સ્ટેશનના પીઆઈ તરીકે જવાબદારી મેળવવા લોકો ભલામણોથી લઈ મોટાં વહેવારો કરતાં હોવાનું જગજાહેર છે. પરંતુ આ સૂર સાધક તેનાથી તદ્દન વિપરીત સ્વભાવનો છે. ફિલ્ડની નોકરીથી મનોમન મૂંઝાતા ગઢવીએ પોલીસ સ્ટેશનમાંથી હટાવીને પોતાને વહીવટી કામગીરી સોંપવા એસપીને સામેથી દરખાસ્ત કરી છે.