મંગળવારે સાંજે ખાવડા પીએસઆઈ એમ.બી. ચાવડા અને પોલીસ સ્ટેશનનો સ્ટાફ રૂટિન કામગીરીમાં વ્યસ્ત હતો ત્યાં અચાનક ૪૪ વર્ષનો યુવક પોલીસ મથકે આવ્યો હતો. પોલીસને તેણે આધાર કાર્ડ બતાવીને પોતે કાશ્મિરનો રહેવાસી હોવાનું જણાવી પાકિસ્તાન જવા માટે મંજૂરી મેળવવા આવ્યો હોવાનું કહ્યું હતું.

પીએસઆઈ ચાવડાએ તેને પોતાની પાસે બોલાવીને પૂછપરછ કરતાં તેણે જણાવ્યું કે ‘સાહેબ મારે પાકિસ્તાની ગર્લફ્રેન્ડને મળવા બોર્ડર ઓળંગવી છે’ પીએસઆઈએ વધુ વિગત મેળવતાં બહાર આવ્યું કે ઈમ્તિયાઝ પોતે ગ્રેજ્યુએટ થયેલો છે પરંતુ થોડાંક મહિનાઓથી માનસિક અસ્થિર હોય તેવું વર્તન કરે છે. ઈમ્તિયાઝ કાશ્મિરના બાંદીપોર જિલ્લાના હાજીનનગરનો રહેવાસી છે. ઘરમાં માતા પિતા અને મોટો ભાઈ છે.

મામલાને ગંભીરતાથી લઈ પોલીસે અન્ય સુરક્ષા એજન્સીઓને જાણ કરતાં બોર્ડર સિક્યોરીટી એજન્સીઓએ દોડી આવી ઈમ્તિયાઝની ગહન પૂછપરછ આદરી હતી. ખાવડા પોલીસે હાજીન પોલીસ સ્ટેશનનો સંપર્ક કરી ઈમ્તિયાઝનો ક્રાઈમ રેકોર્ડ કઢાવ્યો પરંતુ તેનો કોઈ ગુનાહિત ભૂતકાળ નથી. ખેડૂત પરિવારના ઈમ્તિયાઝના સગાં સંબંધીઓ જોડે પણ પોલીસે વાતચીત કરી ખરાઈ કરી.

ઈમ્તિયાઝે અગાઉ કાશ્મિરથી પાકિસ્તાન જવા પ્રયાસ કરેલો પરંતુ નિષ્ફળતા મળેલી. ત્યારબાદ તેને કોઈકે કચ્છથી પાકિસ્તાન જવાય છે તેમ કહેતાં તે ખાવડાથી પોલીસની મંજૂરી લઈ બોર્ડર ક્રોસ કરીને પાકિસ્તાન જવાના મનસુબાથી આવેલો. પાકિસ્તાન જવા માટે પાસપોર્ટ કઢાવવા પણ તેણે અરજી કરેલી. સઘન પૂછપરછમાં કશું શંકાસ્પદ ના જણાતાં અંતે પોલીસે ઈમ્તિયાઝને સમજાવટ કરીને આજે ભુજથી અમદાવાદ અને ત્યાંથી કાશ્મિર મોકલવા માટે રવાના કરી દીધો છે.