ભાવેશ પટેલે ગત નવેમ્બર માસમાં રાજ્યના આરોગ્ય મંત્રી અને જિલ્લા પંચાયત પ્રમુખને લેખીત પત્ર પાઠવી ડૉ. મોતીલાલ રાય મોટાભાગે ભુજ ખાતે ‘ઘેર’ હાજર રહેતાં હોવાની, અઠવાડિયામાં માંડ બે ત્રણ દિવસ ફરજ પર આવતા હોવાની, તાલુકા સંકલન સમિતિની બેઠકમાં સતત ગેરહાજર રહેતા હોવાની અને ચૂંટાયેલા સદસ્યો કે અન્ય લોકોના ફોન ઉપાડી જવાબ આપવાની તસ્દી સુધ્ધાં લેતાં ના હોવાની રજૂઆત કરી તેમની તત્કાળ અસરથી બદલી કરવા અથવા અન્ય શિક્ષાત્મક પગલાં લેવા ફરિયાદ કરેલી.

પટેલે દાવો કર્યો કે થોડાં સમય અગાઉ જિલ્લા કલેક્ટર રાપર સામૂહિક આરોગ્ય કેન્દ્રની મુલાકાતે આવેલા ત્યારે આરોગ્ય વિભાગની ઉણપો જોઈને તેમણે જાહેરમાં મોતીલાલનો ઉધડો લઈ લીધો હતો. પટેલની રજૂઆતો સંદર્ભે આજે આરોગ્ય તંત્રની સૂચનાથી જિલ્લા ટીબી અધિકારી ડૉ. મનોજ દવે મોતીલાલનો ખુલાસો લેવા આવ્યા હતા. 

પટેલ મુંબઈના બીજા નિવાસસ્થાને હતા અને ધમકી મળતા તેમણે પોલીસ મથકે દોડી જઈ મોતીલાલ સામે ફરિયાદ નોંધાવી છે. સમગ્ર ઘટના અંગે જિલ્લા આરોગ્ય અધિકારી ડૉ. મીતેશ ભંડેરીએ જણાવ્યું કે આજના ઘટનાક્રમ મુદ્દે મેં તપાસ અધિકારી પાસે રીપોર્ટ મગાવ્યો છે. રીપોર્ટ બાદ યોગ્ય કાર્યવાહી કરવામાં આવશે.