નખત્રાણા તાલુકાના વડવાકાયા ગામે રહેતા વિપુલ બુચિયાએ પોલીસને જણાવ્યું કે તેમનો ૧૨ વર્ષનો પુત્ર નખત્રાણાની સંતકૃપા સ્કુલમાં ધોરણ ૮માં ભણે છે અને શાળાની હોસ્ટેલમાં રહે છે.

પુત્રને ઈજાના નિશાન અંગે પૂછતાં તેણે ગભરાતાં ગભરાતાં કહ્યું હતું કે તે રમવા ગયો હોઈ લેસન અધૂરું રહી ગયું હતું. લેસન અધૂરું હોઈ શાળાએ તેની નોંધ ગૃહપતિને મોકલી હતી. ગઈકાલે સોમવારે રાત્રે લેસન બાબતે ગૃહપતિ દિલીપસિંહ જાડેજાએ તેને બોલાવીને ‘રમવા જાય કે ગમે ત્યાં જાય લેસન પૂરું હોવું જોઈએ’ તેમ કહી ગાલ પર મુક્કા માર્યાં હતાં. આટલેથી સંતોષ ના થતાં દિલીપે પગ પર લાકડીના ફટકાં મારી વાળ પકડી તેનું માથું દિવાલમાં ભટકાવ્યું હતું.

મારના લીધે ખૂબ પીડા થતી હોઈ ફરિયાદી પુત્રને સારવાર માટે નખત્રાણાની સરકારી હોસ્પિટલે લઈ ગયાં હતાં. માથામાં દુઃખાવો હોઈ છાત્રને સીટી સ્કેન માટે ભુજ મોકલવામાં આવ્યો હતો.