શિકારીઓની જીપનો પીછો કરતાં કરતાં પોલીસ નરા પોલીસ સ્ટેશનની હદમાં આવતા છછલા સુધી પહોંચી ગઈ હતી. દરમિયાન, શિકારીઓની જીપનું એક ટાયર પાળો ચૂકી જતાં બોલેરો જીપ પલ્ટી ખાઈ ગઈ હતી. પાછળ રહેલી પોલીસ સ્થળ પર પહોંચી ત્યારે તેમાં સવાર તમામ શિકારીઓ નાસી છૂટ્યાં હતાં.

પોલીસે બોલેરોની તલાશી લેતાં તેમાંથી ૨૫ કુંજ પંખીના મૃતદેહ, એક દેશી બંદૂક, ૨૪ જીવતાં અને ખાલી કારતૂસ, બે છરી, કુહાડી, એક મોબાઈલ ફોન વગેરે મળી આવ્યાં હતાં. પોલીસે GJ-12 BW-9012 નંબરની બોલેરો કબજે કરીને આર્મ્સ એક્ટ તળે બોલેરો ચાલક, ફોનધારક સહિતના અજાણ્યા શખ્સો સામે ગુનો દાખલ કર્યો છે. શિકારીઓ સામે વન્ય પ્રાણી સંરક્ષણ અધિનિયમ અંતર્ગત કાયદેસર કાર્યવાહી કરવા કુંજ પંખીઓના મૃતદેહ તુગા રેન્જ ફોરેસ્ટરને સુપ્રત કર્યાં છે. સૂત્રોના દાવા મુજબ નાસી ગયેલાં ત્રણેક શિકારી પોલીસની હાથવેંતમાં આવી ગયાં છે. ઉલ્લેખનીય છે કે, નલિયા આરએફઓ (ઉત્તર રેન્જ) એ.એચ. સોલંકીએ અબડાસાના પાટ ગામે સસલા અને તેતરનો શિકાર કરનાર ભજીર મામદ મીઠુ નામના શિકારીને ગઈકાલે પોલીસની મદદથી ઝડપી પાડી ચાળીસ હજારનો દંડ ફટકારવા સાથે અન્ય ધારાઓ તળે કાયદેસરની કાર્યવાહી હાથ ધરી હતી.