એસીબીના મદદનીશ નિયામક કે.એચ. ગોહિલના માર્ગદર્શનમાં મોરબી એસીબી પીઆઈ એમ.એમ. લાલીવાલાએ આ ટ્રેપ ગોઠવી હતી. એસીબીએ મહિલા તલાટીના નિવાસસ્થાને પણ સર્ચ હાથ ધરી છે.

ગ્રામ પંચાયતની હદમાં આવતી સરકારી પડતર જમીન પર હોટેલ રેસ્ટોરન્ટનું નિર્માણ કરવા હેતુ તે જમીન ફાળવવા એક વ્યક્તિએ કલેક્ટર કચેરીમાં અરજી કરેલી. જે સંદર્ભે આ જમીન ગૌચર હેતુની ના હોવાનો ગ્રામ પંચાયતનો દાખલો કાઢી આપવા પેટે તલાટીએ બે હજાર રૂપિયા માંગ્યા હતાં. એસીબીના સૂત્રોના જણાવ્યા મુજબ બિન્ધાસ્ત તલાટીએ અરજદારને વોટસએપ પર મેસેજ કરીને લાંચની રકમ માંગી હતી. આ મામલો ધ્યાને આવતાં આજે ગ્રામ પંચાયતની કચેરીમાં જ એસીબી છટકું ગોઠવીને તલાટીને લાંચ લેતાં રંગેહાથ ઝડપી પાડી છે.

ઉલ્લેખનીય છે કે નખત્રાણા ગ્રામ પંચાયત, મુરુ ગ્રામ પંચાયત સહિત વિવિધ ગામોમાં તલાટી તરીકે ફરજ બજાવનાર ચંદ્રિકા ગરોડાએ નવેમ્બર ૨૦૧૮માં નખત્રાણાના તત્કાલિન મહિલા સરપંચ જિજ્ઞાબેન સોની અને ભાજપના આગેવાન ભરત સોની પર સરકારી ફરજમાં અડચણ સર્જીને જાતિવિષયક ગાળાગાળી કરવા સબબ એટ્રોસિટી સહિતની કલમો તળે ફરિયાદ નોંધાવતાં તે સમયે ભારે ચકચાર મચી ગઈ હતી.