આગના લીધે મરણ જનાર રવિકુમાર સોમેશ્વર રાવ (ઉ.વ. ૪૧) અને તેમની બે વર્ષની માસૂમ દીકરી જ્હાન્વી જીવતાં જ ભડથું થઈ ગયાં હતાં. તેમના પત્ની કવિતા પણ ગંભીર રીતે દાઝી ગયાં છે અને હાલ સારવાર હેઠળ છે. રવિકુમાર ખાનગી કન્ટેઈનર ફ્રેઈટ સ્ટેશનમાં સર્વેયર તરીકે નોકરી કરતાં હતા અને વર્ષોથી મુંદરામાં સપરિવાર સ્થાયી થયાં હતાં. બે માળના મકાનમાં ઉપરના માળે તેઓ રહેતા હતા અને નીચે તેમના મોટાભાઈ મહેશ રાવ રહે છે.

પોલીસે મોટાભાઈના પરિવારજનોની પૂછપરછ કરતાં બહાર આવ્યું કે સવારે કવિતા દૂધ ગરમ કરવા ગેસ સ્ટવ ચાલું કરવા ગયેલાં અને દુર્ઘટના ઘટી હતી.

જો કે, ઘરમાં રહેલો ગેસનો સિલિન્ડર અકબંધ હાલતમાં છે. પો.સ.ઈ. ચાવડાએ ઉમેર્યું કે અમે એસી મિકેનીકને બોલાવી તપાસ કરાવી પરંતુ એસીમાં કોઈ ફોલ્ટ ના હોવાનું બહાર આવ્યું છે. ધડાકો એટલો પ્રચંડ હતો કે બંધ મકાનનો દરવાજો ‘ઉખડી’ને સામેના મકાનની છત પર પડ્યો હતો. તો, સામેના મકાનની બારીઓના કાચ પણ તૂટી ગયાં હતાં. અડોશપડોશના લોકો ગભરાઈને ઘર બહાર દોડી આવ્યાં હતા અને સૌ આગ ઓલવવા મચી પડ્યાં હતાં.