આગની જ્વાળાઓમાં ઘરમાં સૂતેલાં રવિકુમાર સોમેશ્વર રાવ (ઉ.વ. ૪૧) અને તેમની બે વર્ષની માસૂમ દીકરી જ્હાન્વી જીવતાં જ ભડથું થઈ ગયાં હતાં. રવિકુમારના પત્ની કવિતા ગંભીર રીતે દાઝી ગયાં છે અને તેમને ગાંધીધામની ખાનગી હોસ્પિટલમાં સારવાર માટે ખસેડાયાં છે.

સૂત્રોના જણાવ્યા મુજબ ઘરની અંદરથી આગ લાગી હતી. આગે આખા ઘરને લપેટી લીધેલું અને પડોશીઓને જાણ થતાં તેઓ આગ બૂઝાવવા માટે દોડી ગયાં હતાં. આ સમયે ધડાકાનો પણ અવાજ થયો હતો. આ ધડાકો એર કન્ડિશનરનું કોમ્પ્રેસર ફાટવાથી થયો હોવાનું મનાય છે. આગનું કારણ શું તે અંગે પોલીસે અજાણતા દર્શાવી છે. કડકડતી ઠંડીમાં એસી ચાલું હોય તે બાબત ગળે ઉતરે તેવી નથી. ઘરના વાયરીંગમાં શોર્ટ સર્કિટથી પણ આગ લાગી હોઈ શકે છે. દુર્ઘટના અંગે તપાસ કરવા માટે પોલીસે ફોરેન્સિક સાયન્સ લેબના નિષ્ણાતોને સ્થળ પર બોલાવ્યાં છે. એફએસએલની ગહન તપાસમાં જ દુર્ઘટનાનું કારણ સ્પષ્ટ થશે.