નખત્રાણાના મણિનગરમાં રહેતા મૂળ અબડાસાના વિંઝાણ ગામના વતની ૪૯ વર્ષિય મનહરસિંહ વનરાજસિંહ જાડેજાએ ૧૩ માર્ચે માંડવી પોલીસ મથકે લાયજા નજીક ભાગીદારમાં ચાલતાં પેટ્રોલ પંપ પર કામ કરતાં મેનેજર મહમદ હબીબ આમદ ચૌહાણ સામે છેતરપિંડી ઠગાઈની ફરિયાદ નોંધાવી હતી. ૧૦ માર્ચથી હબીબ ભેદી સંજોગોમાં લાપત્તા થઈ ગયેલો. બીજા દિવસે તેના પિતાએ માંડવી પોલીસ મથકે પુત્ર ગૂમ હોવાની નોંધ લખાવેલી.

હબીબ મુંબઈ હોવાની બાતમી મળતાં ત્રીજા દિવસે લોકલ ક્રાઈમ બ્રાન્ચ તેને મુંબઈથી ભુજ પકડી લાવેલી અને માંડવી પોલીસ મથકે સુપ્રત કરી દીધો હતો.

હબીબની પૂછપરછમાં તેણે પોતાને બલિનો બકરો બનાવાઈ રહ્યો હોવાનું જણાવીને બધા રૂપિયા ફરિયાદી મનહરસિંહનો સાળો અશ્વિનસિંહ લગધીરસિંહ ગોહિલ (રહે. મૂળ ભાવનગર, હાલ રહે. મોટા લાયજા) ખાઈ ગયો હોવાનો ઘટસ્ફોટ કરેલો. પોલીસે ગહન તપાસ કરીને અશ્વિનની પણ ધરપકડ કરી હતી.

માંડવી પીઆઈ ચેતક બારોટે જણાવ્યું કે બેઉ જણના મોબાઈલ પર બેન્ક ખાતાંના ટ્રાન્ઝેક્શન માટેના ઓટીપી આવતાં હતાં, બેઉ જણે મનફાવે તેમ રૂપિયા વાપર્યા હોવાનું સ્પષ્ટ થયું છે. પકડાયાં બાદ બેઉ એકમેક પર દોષારોપણ કરી રહ્યાં છે. બંનેની ગહન પૂછપરછ સાથે પોલીસ બેન્કમાં થયેલી આર્થિક લેવડદેવડના વ્યવહારો પણ તપાસી રહી છે. આ રૂપિયામાંથી તેમણે કોઈ સંપત્તિ વસાવી છે કે કેમ તે મુદ્દે પણ તપાસ ચાલી રહી છે.