શનિવારે બપોરે અઢી વાગ્યાના અરસામાં હમીર મુસાભાઈ કોલી (ઉ.વ. અંદાજે ૪૫)ની ઝાડીમાંથી લાશ મળી આવી હતી. હમીર છેલ્લાં એક વર્ષથી નખત્રાણાના વડવા (કાંયા) ગામે મોહન બુચિયાની વાડીએ રહીને ખેતમજૂરી કરતો હતો. વાસી ઉત્તરાયણના દિવસે તેના ગામ વેકરા (રામપર) આવ્યો હતો.

હમીર વડવાની વાડીએ પાછો જતો રહ્યો હશે તેમ માનીને મોટા ભાઈએ તેની કશી શોધખોળ કરી નહોતી. બીજા દિવસે બપોરે પડોશીએ હમીરની લાશ બાવળની ઝાડીમાં પડી હોવાની જાણ કરી હતી.

બનાવની તપાસ કરી રહેલા ગઢશીશા ઈન્ચાર્જ પીઆઈ એચ.એમ. ગોહિલે જણાવ્યું કે મૃતકના ગળે લાલ લુંગીની બે આંટી વીંટળાયેલી હતી અને લાશ નીચે જમીન પર ચતી હાલતમાં પડી હતી. પહેલી જ નજરે બનાવ હત્યા હોવાનું અનુમાન થયેલું જે પોસ્ટમોર્ટમ રીપોર્ટમાં સાચું ઠર્યું છે. મરણ જનાર હમીર દારૂ પીવાની ટેવ ધરાવતો હતો અને છેલ્લાં આઠ વર્ષથી તેની પત્નીથી અલગ રહે છે. મૃતક પાસે રહેલી કોઈ ચીજવસ્તુ ચોરાઈ કે લૂંટાઈ નથી. પોલીસ વિવિધ એંગલ પર તપાસ કરીને હત્યારાને આઈડેન્ટીફાય કરી દબોચી લેવા કેટલાંક શકમંદોની પૂછપરછ કરી રહી છે.