મોટા ભાડિયામાં રહેતી ૩૦ વર્ષિય લાંછબાઈ લક્ષ્મણ હરિભાઈ માલમ (ગઢવી) એ બનાવ અંગે ફળિયામાં રહેતી દેવલબેન મધુડા (ગઢવી) અને તેના પતિ નાથાભાઈ નારાણભાઈ મધુડા વિરુધ્ધ ફરિયાદ નોંધાવી છે.

તેના પર ભરોસો કરીને ફરિયાદીએ તેને ૪.૨૫ લાખના મૂલ્યના વિવિધ પ્રકારના ૭ ઘરેણાં પ્રસંગમાં પહેરવા પૂરતાં આપ્યાં હતાં. અઠવાડિયા પછી ફરિયાદીએ દેવલ પાસે દાગીના પરત માંગતા તેણે નાણાંની જરૂર ઊભી થઈ હોઈ પતિએ તે દાગીના માંડવીમાં ગોલ્ડ ફાઈનાન્સમાં ગીરવે મૂકીને લોન મેળવી હોવાનું જણાવી પૈસાની સગવડ થયે બનતી ઝડપે દાગીના છોડાવીને પાછાં આપી દેશે તેવો વાયદો કરેલો.

દેવલ વાયદા પર વાયદા કરતી રહેતી અને એક માસથી અચાનક પતિ સાથે ગામમાંથી ગાયબ થઈ ગઈ હતી. ફરિયાદીએ ગામમાં રહેતી મોટી બહેન નાગશ્રીબેન નાગાજણ ગઢવીને દેવલ અંગે પૂછપરછ કરતાં નાગશ્રીએ જણાવ્યું કે નવરાત્રિમાં પ્રસંગમાં પહેરવાના નામે દેવલ તેની પાસેથી ૩.૧૫ લાખની કિંમતના પાંચ દાગીના લઈ ગયેલી અને પાછળથી તેના પતિના નામે ગીરવે મૂકીને ગોલ્ડ લોન મેળવી લીધેલી.

દેવલે આ જ બહાને ગામમાં રહેતા દેવલબેન નારાણભાઈ થરીયા (ગઢવી) પાસેથી ૩.૫૦ લાખના મૂલ્યની ૭ તોલાની સોનાની ચાર બંગડી મેળવી ગોલ્ડ લોન મેળવી લીધી છે. તો, નાગઈબેન માણેક ગઢવી પાસેથી પચાસ હજારના મૂલ્યના દાગીના અને રોશનબેન અસલમ હુસેન જુણેજાની ૨૫ હજારની પોંચી મેળવીને તેના પર ગોલ્ડ લોન મેળવી રોકડી કરી ગઈ છે.

ગામની અન્ય ઘણી મહિલાઓ પણ દેવલની છેતરપિંડીનો ભોગ બની છે. પોલીસે ગુનો નોંધી દેવલ અને તેના પતિને શોધવા તપાસ હાથ ધરી છે.