ભુજ APMCમાં શાકભાજીનો જથ્થાબંધ વેપાર કરતો ૩૪ વર્ષિય નરેન્દ્રસિંહ દૈયબતસિંહ જાડેજા (રહે. ગણેશનગર, ભુજ) નિત્યક્રમ મુજબ ચોથી એપ્રિલની પરોઢે બાઈક લઈને APMC જવા નીકળ્યો હતો ત્યારે કોમર્સ કૉલેજ રોડ પર ગોગા ટી સ્ટોલથી સહેજ આગળ અચાનક કોઈ બોલેરોએ તેના બાઈકને પાછળથી ટક્કર મારી હતી.

બનાવ અંગે બીજા દિવસે ભુજ એ ડિવિઝન પોલીસે નરેન્દ્રસિંહના બયાનના આધારે અકસ્માતની ધારાઓ તળે ફરિયાદ દાખલ કરી હતી.

પોલીસે બનાવ સમયના સીસીટીવી કેમેરા ચેક કરતાં ચોંકી ઉઠી હતી. કારણ કે વહેલી પરોઢે રોડ પર કોઈ ટ્રાફિક ના હોવા છતાં આ બોલેરો ટક્કર મારવાના હેતુથી ફરિયાદીના બાઈકનો પીછો કરતી દેખાઈ હતી.

નંબર પ્લેટના આધારે પોલીસે આરોપીને ઓળખીને પૂછપરછ કરી તો આરોપી પૃથ્વીરાજસિંહ ભરતસિંહ સોઢા (ઉ.વ. ૨૫, રહે. વૃંદાવનનગર, સુખપર, ભુજ મૂળ રહે. વિંઝાણ, અબડ઼ાસા) સંબંધમાં ફરિયાદીનો મામાનો દીકરો નીકળ્યો હતો. મામલો સામાન્ય અકસ્માતનો નહીં પણ અંગત અદાવતમાં ખૂનના પ્રયાસનો હોવાનો પોલીસને અંદાજ આવી ગયો હતો.

પોલીસે પૃથ્વીરાજને તપાસ માટે બોલાવતાં તે ખાવડા હોવા છતાં પોતે રાપર હોવાનું ખોટું બોલેલો જેથી પોલીસનો શક વધુ ઘેરો બન્યો હતો. પોલીસે સીસીટીવીના વધુ કેટલાંક પૂરાવા એકઠાં કર્યાં તો સ્પષ્ટ થયું કે બનાવને અંજામ આપતા અગાઉ આગલા દિવસોમાં રૂટની રેકી કરવામાં આવી હતી.

સઘન પૂછપરછમાં આખરે આરોપીએ કબૂલી લીધું કે તેણે મારી નાખવાના હેતુથી બાઈકને ટક્કર મારી હતી. નરેન્દ્રસિંહને પરિવારની એક સ્ત્રી સાથે આડો સંબંધ હોઈ તેણે આ ગુનો આચર્યો હતો. પોલીસે ગુનામાં હત્યાના પ્રયાસ તથા પૂરાવાનો નાશ કરવાની કલમનો ઉમેરો કરીને પૃથ્વીની ધરપકડ કરી લીધી છે. પીઆઈ એ.એમ. પટેલ, પીએસઆઈ બી.ડી. શ્રીમાળીએ ગુનો ડિટેક્ટ કરવા માટે દોડધામ કરી હતી.