ઘટનાને નજરે જોનાર સૂત્રમાંથી મળતી માહિતી મુજબ ગુરુવારે બપોરે બારેક વાગ્યાના અરસામાં પોલીસે ટ્રાફિક ચેકિંગ દરમિયાન નંબર પ્લેટ વગરની, કાળા રંગ અને કાળા કાચવાળી વૈભવી કાર અટકાવી ચેક કરેલી.

કારને પણ પોલીસ સ્ટેશનની અંદર પાર્ક કરી દેવાઈ હતી. થોડીકવાર બાદ નખત્રાણા પંથકમાં પવનચક્કીઓના કામોના કોન્ટ્રાક્ટ અને જમીનોના કોઠાં-કબાડા માટે જાણીતો એક વગદાર શખ્સ પોલીસ મથકે દોડી આવ્યો હતો. એક દોઢ કલાક બાદ આ લિસ્ટેડ બૂટલેગરને કાર સાથે જવા દેવાયો હતો.

ઘટના અંગે કચ્છખબરે ગઈકાલે નખત્રાણાના પીઆઈ એ.એમ. મકવાણાને પૃચ્છા કરતાં તેમણે પોતે તે દિવસે બહારગામ હોવાનું જણાવી, તપાસ કરીને જવાબ આપશે તેમ જણાવેલું. કચ્છખબરે આજે ફરી વિગતો મેળવવા પ્રયાસ કરતાં તેમણે જણાવ્યું હતું કે ‘સમગ્ર કાર્યવાહી પો.સ.ઈ. એમ.વી. શામળાએ કરેલી અને મેં તેમને પૂછ્યું તો શામળાએ કાળા કાચ બદલ ચાલક સામે એન.સી. કેસ કરી, દંડ વસૂલીને તેને જવા દીધો હોવાનું જણાવ્યું છે’

આ મામલે કચ્છખબરે છેલ્લાં બે દિવસ દરમિયાન પો.સ.ઈ. શામળાનો ખુલાસો જાણવા વારંવાર પ્રયાસ કર્યો પરંતુ તેમણે ફોન ઉપાડવાની તસ્દી લીધી નહોતી.

સામાન્ય રીતે આ પ્રકારના એનસી કેસ હોય તો પોલીસ સ્થળ પર મેમો આપીને દંડ વસૂલતી હોય છે, ત્યારે આ કિસ્સામાં ગાડી સાથે ચાલકને પોલીસ સ્ટેશન શા માટે લવાયો તે જ મુદ્દો અનેક સવાલો સર્જે છે. સૂત્રોનો દાવો છે કે નંબર પ્લેટ વગરની જે કાર છે તેની કિંમત લાખ્ખો રૂપિયામાં અંકાય છે અને તે કાર અન્ય રાજ્યમાંથી ચોરાયેલી હોવાની આશંકા છે. સમગ્ર ઘટના પોલીસ સ્ટેશનના સીસીટીવી કેમેરામાં કેદ થઈ ગઈ છે પરંતુ તે સીસીટીવી ચેક કરાયાં નથી. જો આ સીસીટીવી ફૂટેજ ચેક કરાય તો દૂધનું દૂધ અને પાણીનું પાણી થઈ જાય. શું પોલીસે ભલામણથી કાર્યવાહી કર્યા વગર આરોપીને જવા દીધો કે પછી મોટો વહેવાર થયો તે રામ જાણે.