શહેરના કેમ્પ એરિયામાં રહેતા હરપાલસિંહ બળવંતસિંહ સોઢાએ ભુજ એ ડિવિઝન પોલીસ મથકે નોંધાવેલી ફરિયાદમાં જણાવ્યું કે ગત રાત્રે ૧૧ વાગ્યાના અરસામાં તે તથા કાકાનો પુત્ર યોગેન્દ્રસિંહ સોઢા અને અન્ય બે મિત્રો મળી ચાર જણાં જ્યુબિલી ગ્રાઉન્ડમાં રમાતી મેચ જોવા ગયેલાં. દરમિયાન, યોગેન્દ્રસિંહના ફોન પર અક્ષયરાજસિંહ વાઘેલાનો ફોન આવ્યો હતો અને યોગેન્દ્રએ તેને ગ્રાઉન્ડ સામે આવેલી ટી પોઈન્ટ નામની દુકાન પાસે રૂબરૂ મળવા બોલાવ્યો હતો. યોગેન્દ્ર સાથે ફરિયાદી સહિત ચારે જણ આ દુકાન આગળ આવીને ઊભેલાં.

થોડીકવાર બાદ GJ-09 BJ-9934 નંબરની કાળા રંગની થાર કાર આવી હતી. કારમાંથી અક્ષય સાથે ભાવેશ ગોસ્વામી, જુવાનસિંહ સોઢા અને સત્યરાજસિંહ વાઘેલા એ ચાર જણ ધારિયા અને છરી જેવા ઘાતક હથિયારો સાથે નીચે ઉતર્યાં હતાં અને યોગેન્દ્ર જોડે ઝઘડો કરી મારકૂટ કરવા માંડ્યાં હતાં.

યોગેન્દ્રને બચાવવા પડેલાં ફરિયાદીને પણ આરોપીઓએ માર માર્યો હતો જેમાં તેને હાથમાં સામાન્ય ઈજા થઈ હતી. બબાલના પગલે લોકો એકઠાં થઈ જતાં ચારે જણ થારમાં બેસીને મારી નાખવાની ધમકી આપી રવાના થઈ ગયાં હતાં.

લોહીલુહાણ યોગેન્દ્રને જી.કે. જનરલ હોસ્પિટલ લઈ જવાયો હતો પરંતુ ઈજા ગંભીર હોઈ તેને કે.કે. પટેલ હોસ્પિટલમાં ખસેડાયો હતો. સારવાર હેઠળ રહેલો યોગેન્દ્ર હાલ બેહોશીની હાલતમાં જીવન મરણ વચ્ચે ઝોલાં ખાઈ રહ્યો છે. ડૉક્ટરોએ જણાવ્યું કે છરીનો એક ઘા ડાબી બાજુ ફેફસાં સુધી અને બીજો ઘા છેક આંતરડા સુધી વાગ્યો છે, જેનાથી મૃત્યુ નીપજી શકે. ભુજ એ ડિવિઝન પોલીસે આજે બપોરે ચારે આરોપી સામે હત્યાના પ્રયાસ સહિતની કલમો તળે ગુનો નોંધ્યો છે. પીઆઈ હાર્દિક ત્રિવેદીએ તપાસ હાથ ધરી છે.