રાજપરાએ સદેહે ઉપસ્થિત રહેવાના બદલે વીડિયો કોન્ફરન્સિંગ મારફતે જુબાની લેવા હાઈકૉર્ટે નિયત કરેલાં માપદંડો મુજબ અરજી કરી હતી. સુનાવણી સમયે બચાવ પક્ષના વકીલોએ કૉર્ટમાં વીડિયો કોન્ફરન્સિંગ માટે પૂરતી સુવિધાઓ ના હોવાનું જણાવી રાજપરા રૂબરૂ જ હાજર રહે તેવી રજૂઆત કરી વી.સી.નો વિરોધ કર્યો હતો.

છઠ્ઠા અધિક સેશન્સ જજ ડૉ. શિલ્પાબેન કાનાબારે પણ આ મામલે જણાવ્યું કે ભુજમાં ફક્ત પ્રીન્સિપાલ ડિસ્ટ્રીક્ટ જજ અને ચોથા અધિક ડિસ્ટ્રીક્ટ જજ એમ બે જ કૉર્ટમાં વીડિયો કોન્ફરન્સિંગની સુવિધા ઉપલબ્ધ છે. આ કૉર્ટમાં પૂરતાં કેમેરા સાથે વી.સી. માટેનું પૂરતું ઈન્ફ્રાસ્ટ્રક્ચર જ નથી તેમ જણાવતાં કહ્યું કે વી.સી. માટે વપરાતી ઝૂમ એપ્લિકેશનનું લાયસન્સ વર્ઝન પણ કૉર્ટ પાસે ઉપલબ્ધ નથી. ઝૂમનું ફ્રી સોફ્ટવેર વપરાય છે અને ૪૫ મિનિટની સમયમર્યાદા બાદ ૧૫ મિનિટનો બ્રેક લેવો પડે છે.

હાઈકૉર્ટના નિર્દેશ મુજબ વી.સી. માટે કોમ્પ્યુટર, લેપટોપ, મોબાઈલ ડિવાઈસ સાથે દસ એમબીપીએસની ઈન્ટરનેટ કનેક્ટીવીટી, અન ઈન્ટરપ્ટેડ પાવર સપ્લાય, કેમેરા, સ્પીકર, માઈક, ડિસ્પ્લે યુનિટ, ફાયરવૉલ, ડૉક્યુમેન્ટ વિઝ્યુઅલાઈઝર કેમેરા, પ્રાઈવસી માટે પૂરતી બેઠક વ્યવસ્થા, યોગ્ય પ્રકાશ વ્યવસ્થા, શાંત અને સલામત જગ્યા વગેરે જરૂરી છે.

કૉર્ટમાં કોઈ ટેકનિકલ તકલીફ થાય તો તેને ઉકેલવામાં મદદ માટે કોઈ ટેકનિકલ માણસ પણ નથી. કંઈક અર્જન્ટ જરૂર સર્જાય ત્યારે સિનિયર સેશન્સ કૉર્ટમાં તેમની વ્યસ્તતાના લીધે તથા મોસ્ટ જૂનિયર સેશન્સ જજ હોઈ ટેકનિકલ મદદ માટે લાંબો સમય રાહ જોવી પડે છે.

વીડિયો કોન્ફરન્સિંગથી જ જુબાની આપવાના રાજપરાના અભિગમને જક્કી વલણની ટીકા કરતાં જજે જણાવ્યું કે અગાઉ પણ આવા અનેક પ્રસંગે કૉર્ટે રાજપરાને વી.સી.ની અપૂરતી સુવિધા અંગે વાકેફ કરેલાં છે. મેં પોતે પણ વ્યક્તિગત રીતે તેમને આ મામલે જણાવેલું છે. એટલું જ નહીં, કૉર્ટમાં વી.સી. માટે પૂરતી સગવડ ના હોવા અંગે ૦૧-૦૧-૨૦૨૫ના રોજ એફએસએલ ડાયરેક્ટરને પણ કૉર્ટે પત્ર લખી જાણ કરેલી છે.

આ બાબતની ગંભીરતાનો ખ્યાલ આવે તે હેતુથી કૉર્ટ તેમને એક રૂપિયાનો પ્રતીક દંડ ફટકારે છે. એફએસએલ અધિકારીઓને રૂબરૂ જુબાની આપવા માટે જરૂરી દિશાનિર્દેશ જારી કરવા કૉર્ટે ચુકાદાની નકલ એફએસએલ ડાયરેક્ટર, ગાંધીનગર અને ડાયરેક્ટર ઑફ પ્રોસિક્યુશનને મોકલી આપવા જણાવ્યું છે.