ગુંડાતત્વો પર તૂટી પડવાના રાજ્ય પોલીસ વડાના આદેશના પગલે આજે સાંજે ભુજના વિવિધ સંવેદનશીલ વિસ્તારોમાં લોકલ ક્રાઈમ બ્રાન્ચ, ભુજ એ અને બી ડિવિઝન પોલીસ, માધાપર પોલીસ, એસઓજી, પેરોલ ફર્લૉ સ્ક્વૉડ, જિલ્લા અને સીટી ટ્રાફિક બ્રાન્ચના કાફલાએ સંયુક્ત કોમ્બિંગ ઓપરેશન હાથ ધર્યું હતું.

એરપોર્ટ રોડ પર સેવન સ્કાય હોટલ સામે માલધારીનગરમાં આવેલા નુરમામદ ઈબ્રાહિમ અજડિયાના વાડામાં પોલીસે સર્ચ કરતાં ત્યાંથી નાનાં મોટાં સાત ધારિયા, ત્રણ લોખંડની પાઈપ, મોટર સાયકલના ચક્રમાંથી બનાવેલાં બે હથિયાર, એક-એક કુહાડી અને તલવાર સહિત કુલ ૧૪ હથિયાર મળી આવ્યાં હતાં.

નૂરમામદ સાથે રહેલા મોહિત પ્રદિપ માખીજા નામના અન્ય આરોપીને પોલીસે ઝડપ્યો હતો. આ એ જ મોહિત છે કે જેના નામની પેઢી ખોલીને ગાંધીધામના રીઢા દાણચોરોએ ઈન્ડસ્ટ્રીયલ સૉલ્ટના નામે કરોડો રૂપિયાની સોપારી મગાવી, દાણચોરી કરી ભારતમાં વેચી ખાધી હતી.

નૂરમામદ સામે પણ અગાઉ મારામારીનો એક બનાવ દાખલ થયેલો છે. ઘટના અંગે ભુજ એ ડિવિઝન પોલીસ ઈન્સપેક્ટર હાર્દિક ત્રિવેદીએ બંને જણની અટક કરીને સઘન તપાસ હાથ ધરી છે. કોમ્બિંગ દરમિયાન પોલીસે ૪૨ મકાનોમાં સર્ચ કરેલું અને નંબર પ્લેટ વગરના ૭ વાહનો ડીટેઈન કરી ૨૧ હજાર રૂપિયાનો સ્થળ દંડ વસૂલ્યો હતો.