ગોપાલે જણાવ્યું કે જૂલાઈ ૨૦૨૨માં તેના ભાઈ ભવાન કોલીએ ચોબારીના વિષ્ણુ ભીખાભાઈ આહીર પાસે રહેલી વડોદરા પાસિંગની મારુતિ અર્ટીગા કાર ૫.૩૫ લાખમાં ખરીદવા સોદો નક્કી કરેલો.

દરમિયાન, ૦૪-૦૮-૨૦૨૨ના રોજ ભચાઉ પોલીસે મધરાત્રે મનફરા ગામના વાડી વિસ્તારમાં ભવાન કોલીના ઘર આગળ પાર્ક કારની તલાશી લઈ તેમાંથી ૫૪ હજાર ૫૦૦ના મૂલ્યનો શરાબ જપ્ત કરેલો. પોલીસે ગાડી જપ્ત કરેલી. જપ્ત ગાડી છોડાવવા માટે માલિકીના કાગળિયાની જરૂર ઊભી થતાં વિષ્ણુ આહીર અને માદેવા આહીરે ગોપાલનો ચોબારીના પ્રવિણ વશરામ રાજાણી (આહીર)ને સાથે મેળાપ કરાવી આપેલો.

૦૮-૦૧-૨૦૨૩ના રોજ રાપરના માંજુવાસ પાસેથી ફરી આ જ ગાડી દારૂની ખેપ મારતાં રાપર પોલીસના હાથે ઝડપાઈ હતી. તેમાંથી ૧.૪૬ લાખનો શરાબ જપ્ત થયેલો. કારમાં સવાર બે અજાણ્યા શખ્સો પોલીસને જોઈ અંધારામાં ફરાર થઈ ગયેલાં. ગાડી છોડાવવા માટે નવેસરથી માલિકીના કાગળિયાની જરૂર ઊભી થતાં ગોપાલે વિષ્ણુ અને માદેવા આહીરનો સંપર્ક કરેલો. તેમણે તેને ફરી પ્રવિણ રાજાણીનો સંપર્ક કરી લેવા જણાવેલું.

જો કે, આરોપીઓ ભેગાં મળીને ગોપાલની બોગસ સહી કરી તેને હાઈકૉર્ટમાં રજૂ કરીને ગાડી છોડાવવાનો હુકમ લઈ આવ્યાં હતાં.

ગોપાલ ગાડી છોડાવવા રાપર પોલીસ સ્ટેશને હાઈકૉર્ટનો હુકમ લઈને ગયો ત્યારે નવો વળાંક આવ્યો હતો. પોલીસે આ ગાડી ચોરીની હોવાનું જણાવીને ગાડીનો કબજો આપવાનો ઈન્કાર કરી દીધો હતો. સમગ્ર મામલે હાઈકૉર્ટે તપાસનો હુકમ કર્યાં બાદ પોલીસે ચોબારીના વિષ્ણુ આહીર, માદેવા આહીર અને પ્રવિણ રાજાણી વિરુધ્ધ ગોપાલની ફરિયાદ નોંધી તપાસ હાથ ધરી છે.