કચ્છના બંદરો પર વિદેશથી આયાત થતાં ઉચ્ચ ગુણવત્તાના PCI (Pulverized Coal Injection) થર્મલ કોલ ભરેલી ટ્રક ટ્રેલરોના ડ્રાઈવરોને ફોડીને ભચાઉનો દિવ્યરાજ હિતેન્દ્રસિંહ ઝાલા (રહે. દરબારગઢ, ભચાઉ) આ ખૂલ્લા વાડામાં લઈ આવતો. અહીં તેણે કામે રાખેલાં માણસો મજૂરો પચાસ ટકા કોલસો કાઢીને ચોરી લેતાં.

સ્થળ પરથી ઝડપાયેલાં મયોદ્દીન રસૂલભાઈ ચૌહાણ નામના પગારદાર સુપરવાઈઝરે કબૂલ્યું કે કોલસાની ભૂકી દિવ્યરાજ મોરબીના કારખાનાઓમાંથી મગાવતો અને ચોરેલો ઈમ્પોર્ટેડ PCI કોલ તે મોરબીના કારખાનાવાળાઓને વેચી ખાતો હતો.

SMCએ દરોડો પાડ્યો ત્યારે GJ-12 BZ-5135 નંબરના ૧૮ વ્હિલના ટ્રેલરમાં ભરેલો PCI કોલ હિટાચી મશીન વડે બહાર કઢાતો હતો. બાજુમાં એક લોડર પડેલું અને કેટલાંક મજૂર ત્યાં કામ કરતાં હતાં. SMCએ ટ્રેલરચાલક લક્ષ્મણસિંહ ચૌહાણની પૂછપરછ કરી તો તેણે જણાવ્યું કે તે ગાંધીધામની વિરાત્રા કંપનીમાં ડ્રાઈવર તરીકે નોકરી કરે છે. કંડલાથી ઈમ્પોર્ટેડ કોલસો ભરેલું ટ્રેલર લઈને તે નીકળ્યો ત્યારબાદ તેના શેઠ રાહુલભાઈનો તેને ફોન આવેલો કે ભચાઉ ગુરુકૃપા હોટલ સામે દિવ્યરાજ બાઈક લઈને ઊભો છે. લક્ષ્મણે જણાવ્યું કે અગાઉ પણ આ વાડામાં એકવાર શેઠના કહેવાથી કોલસા ભરેલું ટ્રેલર કટીંગ કરાવી ગયો હતો. દિવ્યરાજને તે ઓળખતો હતો અને દિવ્યરાજની દોરવણી હેઠળ બીજીવાર આ વાડે ટ્રેલર લઈને આવ્યો છે.

કંડલા પોર્ટ ખાતે ટ્રક ટ્રેલરોમાં આયાતી કોલસો લોડ થયા બાદ તાડપત્રી લગાડીને તેના પર સીલ મારી દેવાય છે. દિવ્યરાજ આ સીલ તોડી નાખીને માલ ચોરી લેતો હતો. સ્થળ પર પડેલા લોડરને કબજે કરી તેની તલાશી લેવાઈ ત્યારે તેના ટૂલકિટ બોક્સમાંથી પીળા રંગના પ્લાસ્ટિક સીલની ૧૪ કોથળી મળી આવી હતી. એક કોથળીમાં ૪૦ સીલ હોય છે. આરોપીઓ માલનું મિક્સીંગ કરીને આ નકલી સીલ મારી દેતાં હોય તેવી આશંકા છે. SMC ત્રાટકી તેની થોડીક મિનિટ અગાઉ જ દિવ્યરાજ જમવાના બહાને સ્થળ પરથી સરકી ગયો હતો.

સ્થળ પરથી પોલીસે ૨૨.૭૫ લાખનો ૧૭૫ ટન ઈમ્પોર્ટેડ PCI કોલ, ૧ લાખ ૦૮ હજારની કિંમતના ૧૩૫ ટન કોલસાની ભૂકી, ત્રણ વાહનો, પાંચ મોબાઈલ ફોન, આરોપીઓના કબજામાંથી મળેલાં રોકડાં ૧૩ હજાર ૩૭૦ રૂપિયા વગેરે મળી કુલ ૯૪ લાખ ૨૬ હજાર ૩૭૦ રૂપિયાનો મુદ્દામાલ કબજે કર્યો છે.

SMCએ ઝડપાયેલાં પાંચ આરોપીઓ ઉપરાંત સૂત્રધાર દિવ્યરાજ ઝાલા, વિરાત્રાના માલિક રાહુલ, ત્રણે વાહનોના માલિક સહિત કુલ ૧૦ સામે એકમેકની મદદ કરીને અંગત આર્થિક લાભ માટે ગુનાહિત કાવતરું ઘડીને, ટ્રક ડ્રાઈવરોને ફોડીને, કોલસાની ચોરી કરી, ભેળસેળ કરી, તેનો સંગ્રહ કરી, ખરીદ વેચાણ કરીને વિશ્વાસઘાત કરવા સબબ BNSની કલમ ૩૦૩ (૧), ૩૧૬ (૩) (૪), ૩૧૭ (૧) (૨) (૪), ૩૧૮ (૩), ૬૧ (૨) (a) અને ૫૪  હેઠળ ભચાઉ પોલીસ મથકમાં સરકાર તરફે ફરિયાદ નોંધાવી છે.

ભચાઉ અને આસપાસના વિસ્તારોમાં લાંબા સમયથી વાહનોના ડ્રાઈવરોને ફોડીને કોલસો, ખાદ્યતેલ, કિંમતી કેમિકલ્સ, પેટ્રોલયિમ પ્રોડક્ટસ વગેરે જેવી ઈમ્પોર્ટેડ કોમોડિટીઝની ચોરી કરવાનું નેટવર્ક સુવ્યવસ્થિત રીતે ધમધમે છે. સ્થાનિક ખાખીધારીઓના આંખ મિંચામણા વગર આ હરગીઝ શક્ય નથી.

તાજા દરોડા બાદ કોઈના પર ઠીકરું ફૂટે છે કે કેમ તે જોવું રહ્યું. જો ના ફૂટે તો આંખો બંધ કરીને માની લેવું કે સમગ્ર નેટવર્કના તાર બહુ લાં...બા છે!