ગાડીને સાઈડમાં હટાવવા જેવા નજીવા મુદ્દે ભુજના દલિત યુવકને જાતિ અપમાનિત કરી પાઈપ વડે હુમલો કરનારા ભુજના ભાજપના નગરસેવક ધર્મેશ ગોર બે દિવસમાં જ જામીન પર છૂટી ગયો છે. ભુજની સ્પે. એટ્રોસીટી કૉર્ટે તેને જામીન આપ્યાં છે.

ગામમાં ખૂલ્લેઆમ ફરતો ધર્મેશ ફરિયાદ પાછી લેવા માટે ખોટી અરજીઓથી લઈ ધાક-ધમકી કરતો હોવાની ફરિયાદી રમેશ વણકરે SC/ST CELLના DySP અને SPને રજૂઆતો કરેલી. પરંતુ, પોલીસ તેને પકડવાનું જાણે ભૂલી જ ગયેલી! રમેશભાઈએ મંગળવારે સવારે રેન્જ આઈજી કચેરીમાં આ મામલે વધુ એકવાર રજૂઆત કરતાં SC/ST CELL દ્વારા ધર્મેશની તે જ દિવસે ધરપકડ કરીને જેલહવાલે કરી દીધો હતો.

આજે કૉર્ટમાં બંને પક્ષે દલીલો થઈ ગઈ અને કૉર્ટે ચુકાદો પણ સંભળાવી દીધો. ગુનાની મહત્તમ સજા સાત વર્ષની હોવાનું, મહત્વની તપાસ પૂરી થઈ ગઈ હોવાનું, તપાસમાં તેની જરૂર નથી, આરોપી સ્થાનિક છે અને ક્યાંય નાસી જાય તેવી શક્યતા નથી તેવું જણાવીને કૉર્ટે તેને જામીન પર છોડવા હુકમ કર્યો છે. સ્પે. એટ્રોસીટી કૉર્ટના વિદ્વાન જજ વિશાલ વી. શાહે આજે આ ચુકાદો આપ્યો છે. ઉલ્લેખનીય છે કે ધર્મેશ ગોર પર અગાઉ છ ગુના નોંધાયેલાં છે.