ભુજ રહેતા પ્રતાપસિંહ શેખાવત અને તેમના પાર્ટનરોએ અંજારમાં મોટો પ્લોટ ખરીદી, તેમાં સબ પ્લોટીંગ કરીને કન્સલ્ટન્ટ પાસે નવા લે આઉટનો પ્લાન નકશો બનાવડાવી મંજૂરી માટે ‘આડા’માં અરજી કરી હતી. તેમની અરજી સંદર્ભે ‘આડા’ના બે સર્વેયર અમિત લલિતભાઈ વ્યાસ (૨૫, રહે. આદિપુર) અને દિપેન ધનજીભાઈ રૈયાણી (૩૮, રહે. અંજાર)એ મંજૂરી માટે હકારાત્મક અભિપ્રાય આપવાની અવેજમાં ૩૦ હજારની લાંચ માંગી હતી. ફરિયાદી લાંચ આપવા ઈચ્છતાં ના હોઈ તેમણે પશ્ચિમ કચ્છ એસીબીનો સંપર્ક કર્યો હતો. દિપેને ફરિયાદીને અમિત વ્યાસને મળી લેવા જણાવેલું. અમિતે કન્સલ્ટન્ટ મારફતે લાંચની માંગણી કરી હતી.

આ ગુનામાં આજે ૧૬ વર્ષ અને ૯ મહિને અંજારના અધિક વિશેષ એસીબી જજ કમલેશ કે. શુક્લએ બેઉ આરોપીને દોષી ઠેરવી ભ્રષ્ટાચાર નિવારણ અધિનિયમની કલમ ૧૩ (૧) (ડી) અને ૧૩ (૨) હેઠળ ૧ વર્ષની સાદી કેદ સાથે બેઉને ૧૦ ૧૦ હજાર રૂપિયા દંડ તથા કલમ ૭ અને ૧૨ હેઠળ ૮ માસની સાદી કેદ સાથે ૧૦-૧૦ હજારનો દંડ ફટકાર્યો છે. કેસમાં સરકાર તરફે અંજારના એપીપી આશિષ પી. પંડ્યાએ હાજર રહીને દલીલો કરી હતી.