આ પૂર્વભૂમિકા વચ્ચે અંજારમાં કિશોર વયની છોકરીના પ્રેમમાં પડીને શારીરિક સંબંધો બાંધી તેને ગર્ભવતી બનાવવાના ગુનાના આરોપી ૨૩ વર્ષિય યુવકની નિયમિત જામીન અરજી અંજાર સેશન્સ કૉર્ટે પાંચમી વખત નામંજૂર કરી છે.

પોલીસે ઈપીકો કલમ ઉપરાંત પોક્સો અને એટ્રોસીટીની કલમો તળે ગુનો દાખલ કર્યો હતો. આ ગુનામાં બે વર્ષથી વધુ સમયથી આરોપી જેલમાં કેદ છે. અગાઉ હાઈકૉર્ટમાં તેણે જામીન મેળવવા અરજી કરેલી પરંતુ કૉર્ટનું વલણ જોતાં અરજી પરત ખેંચી લીધી હતી. આ વખતે આરોપીના વકીલે દલીલ કરી કે ફરિયાદ પક્ષ સાથે સમાધાન થઈ ગયું છે, ગુનાનો ભોગ બનનાર યુવતી અને અન્ય સાક્ષીઓની જુબાની પૂરાવા લેવાઈ ગયાં છે અને તેમાં ક્યાંય આરોપીએ અપહરણ કરી બળજબરીથી શારીરિક સંબંધ બાંધ્યો હોવાના આરોપ નથી.

નોંધનીય છે કે ભારતીય ન્યાય વ્યવસ્થામાં વ્યક્તિ સ્વાતંત્ર્યના મૂળભૂત બંધારણીય અધિકારને અગ્રતા અપાયેલી છે. તેથી કોઈ ખાસ ગંભીર ગુનો, કારણો કે તારણો ના હોય તો અદાલતો ‘બેઈલ ઈઝ ધ રૂલ એન્ડ જેઈલ ઈઝ ધ એક્સેપ્શન (જામીન આપવા તે નિયમ છે, જેલ અપવાદરૂપ છે)’ના મુદ્રાલેખને અનુલક્ષીને આરોપીને પ્રી-ટ્રાયલ કન્વિક્શન (ટ્રાયલ પૂર્વેની સજા) ના થાય તે હેતુથી મોટાભાગે જામીન પર મુક્ત કરી દેતી હોય છે.