મૂળ ઉત્તરપ્રદેશના પ્રતાપગઢનો વતની રાહુલ ગૌડ અને તેની પત્ની પૂજા ગૌડ બેઉ વેલસ્પન કંપનીમાં અલગ અલગ યુનિટમાં નોકરી કરે છે. તેમના ભાડાના ઘરના એક રૂમમાં રાહુલનો હમવતની મિત્ર ઈન્દ્રજીત ગુર્જર છેલ્લાં અઢી વર્ષથી રહેતો હતો. ઈન્દ્રજીત ગુર્જર પણ વેલસ્પન કંપનીના સિક્યોરીટી વિભાગમાં બાઉન્સર તરીકે નોકરી કરે છે.

ગઈકાલે શુક્રવારે બપોરે અંજારના અરિહંતનગર પાછળની નર્મદા કેનાલમાંથી રાહુલનો મૃતદેહ મળી આવ્યો હતો. ગળા પર છરી જેવા તીક્ષ્ણ હથિયારના ત્રણ ઘા મારેલાં હતાં. રાહુલ ગુરુવારે સાંજે સાત વાગ્યે નોકરી પરથી છૂટ્યાં બાદ ગાયબ થયો હતો. હત્યાના પગલે અંજાર પોલીસ ઈન્સ્પેક્ટર એ.આર. ગોહિલે તુરંત ટેકનિકલ સર્વેલન્સ અને હ્યુમન સોર્સને એક્ટિવ કરી દીધાં હતાં અને ગણતરીના કલાકોમાં જ પોલીસના રડાર પર ઈન્દ્રજીત ગુર્જર આવી ગયો હતો.

પીઆઈ ગોહિલે જણાવ્યું કે રાહુલના મર્ડર કેસમાં અમે ઈન્દ્રજીત ગુર્જરની ધરપકડ કરી છે, હત્યામાં તેનો મિત્ર ધીરજકુમાર પણ સામેલ હતો. જો કે, ધીરજકુમાર પોલીસના હાથ લાગ્યો નથી.

જો કે,  મોંઘો ફોન જોઈને ઈન્દ્રજીતની ‘દાઢ’ સળકી હતી. તેણે થોડાંક સમય અગાઉ યુપીથી તેના મિત્ર ધીરજકુમારને અંજારમાં બોલાવેલો અને નોકરીએ રખાવી દેવાનું વચન આપેલું. ઈન્દ્રજીતે ધીરજકુમાર જોડે મળીને આ મોબાઈલ ફોન લૂંટી લેવાનું કાવતરું ઘડ્યું હતું.

બેઉ જણે સેમસંગ ફોન લઈ, તેનો પાસવર્ડ જાણીને ફોન લઈ લીધો હતો. બાદમાં ઈન્દ્રજીતે રાહુલને પકડી રાખેલો અને ધીરજે તેના ગળામાં છરી વડે વાર કરી લાશને કેનાલમાં નાખી દીધી હતી. પોલીસે જણાવ્યું કે ધીરજકુમાર અને ઈન્દ્રજીત બેઉ અગાઉ લખનૌમાં સાથે કામ કરતાં હતાં. ધીરજકુમાર અગાઉ દિલ્હીના એક મર્ડર કેસમાં પણ પોલીસ ચોપડે ચઢી ચૂકેલો છે. ધીરજને ઝડપી પાડવા ચોમેર શોધખોળ ચાલી રહી છે.