મંગળવારની મધ્ય રાત્રિ બાદ બે વાગ્યાથી પાંચ વાગ્યાના અરસામાં ગામના છ મંદિરમાં સામૂહિક ચોરી થતાં ગામમાં ભારે ચકચાર મચી ગઈ હતી.

મંદિરોમાંથી ચોરેલાં સોના ચાંદીના ૬૨ છત્તરો અને રસોડાના વાસણો વગેરે માલ ગામની ભાગોળે બાવળોની ઝાડીઓમાં છૂપાવેલો, જે પોલીસે રીકવર કરી લીધો છે. ક્રિમિનોલોજીમાં ગુના પૂર્વે અને ગુના પછીનું આરોપીનું વર્તન પણ ઘણીવાર પોલીસને ગુનો ઉકેલવામાં ખૂબ મદદરૂપ થતું હોય છે. અંજારના પોલીસ ઈન્સ્પેક્ટર એ.આર. ગોહિલે જણાવ્યું કે મંદિરોમાં સામૂહિક ચોરી થયા બાદ સવારે ગામમાં ભારે હોબાળો થયો હતો.

ફરિયાદી જીવાભાઈને ત્યારે કલ્પના સુધ્ધાં નહોતી કે પોલીસને જાણ કરવાની સૂચના આપનાર પ્રદિપે જ તેના સાગરીત પુનિત જોડે હાથ માર્યો છે. બેઉ જણ દારૂ પીવાની ટેવ ધરાવે છે અને અંગત મોજશોખ પૂરાં કરવાના હેતુથી તેમણે મંદિરોમાં ચોરી કરી હતી તેમ પીઆઈ ગોહિલે ઉમેર્યું છે.