મધ્યપ્રદેશના ઈન્દોર નજીક આવેલા દેપાલપુર ગામના ૩૦ વર્ષિય મુકેશ રામેશ્વર ઓડ (રાજપૂત) સામે કમલ મોજીલાલ ઓડે અંજાર પોલીસ મથકે ૧૭-૦૪-૨૦૦૨ના રોજ પોતાના તથા નજીકના તંબુમાં રહેતા બંસીલાલના તંબુને કેરોસીન છાંટી આગ ચાંપીને સિત્તેર હજારની ઘરવખરી તથા બાઈકને સળગાવી નુકસાન કર્યાની ફરિયાદ નોંધાવી હતી.

કમલ તેના સાળા બાદરસિંહ ભુરિયા સાથે રહેતો અને બનાવના ત્રણેક દિવસ અગાઉ બાદરસિંહને મારી ભત્રીજી જોડે અનૈતિક સંબંધ છે તેવું આળ મૂકીને મુકેશે જોરદાર ઝઘડો કરેલો.

આ કેસમાં અંજાર પોલીસે ઈપીકો કલમ ૪૩૬ અને ૪૪૭ હેઠળ ગુનો દાખલ કરેલો. જો કે, પ્રારંભિક કાર્યવાહી બાદ મુકેશ પોતે ગામ મૂકીને નાસી ગયો હતો.

કૉર્ટે વર્ષો જૂનાં કેસોનો ઝડપથી નિકાલ કરવાના ભાગરૂપે ટ્રાયલ શરૂ કરેલી. તંબુને કેરોસીન છાંટી સળગાવાયા હોવાનો એફએસએલનો રીપોર્ટ, મુકેશે ધમકી આપી હોવાના અને તે મુજબ આગ ચાંપીને નુકસાન કર્યાની સ્થાનિક પંચોની જુબાનીને ધ્યાને રાખીને અંજારના અધિક સેશન્સ જજ કે.કે. શુક્લએ આજે મુકેશને દોષી ઠેરવી પાંચ વર્ષની સખ્ત કેદની સજા ફટકારી છે. આ કેસમાં સરકાર તરફે એપીપી આશિષ પંડ્યાએ હાજર રહીને દલીલો કરી હતી. વર્ષો જૂના આ કેસમાં કેટલાંક સાક્ષીઓ પણ મૃત્યુ પામ્યાં હતાં. મુકેશ પકડાયાં બાદ સજાનો અમલ કરવા કૉર્ટે ચુકાદામાં નોંધ કરી છે.