અબડાસામાં આવેલી અલ્ટ્રાટેક સિમેન્ટ કંપનીમાં માલ સામાનનું પરિવહન કરતાં અબડાસાના વિવિધ ગામના ૧૪ જેટલાં ટ્રકચાલકો પાસે બોગસ હેવી ડ્રાઈવીંગ લાયસન્સ હોવાની એસઓજીને નામજોગ બાતમી મળેલી. જેના પગલે એસઓજીએ બે દિવસ અગાઉ તમામ ૧૪ ટ્રક ડ્રાઈવરોને ડ્રાઈવીંગ લાયસન્સ સાથે વાગોઠ ચેક પોસ્ટ ખાતે બોલાવ્યાં હતાં.

ડ્રાઈવરોની પૂછપરછમાં જાણવા મળેલું કે તેઓ ભુજ આરટીઓ કચેરીમાં કદી ગયાં જ નહોતા કે કોઈ પ્રકારનો ડ્રાઈવીંગ ટેસ્ટ પણ આપ્યો નહોતો. એસઓજીએ તમામ ડ્રાઈવીંગ લાયસન્સ જપ્ત કરીને ભુજ આરટીઓ કચેરીમાં ખરાઈ માટે મોકલી આપતાં આ ડ્રાઈવીંગ લાયસન્સ ખોટાં હોવાનું પૂરવાર થયું છે.

ડ્રાઈવરોની પૂછપરછ કરતાં જાણવા મળ્યું કે વલસરા ગામના જુમા હારૂન મિંયાજી અને ઈસ્માઈલ ઈબ્રાહિમ દરાડ, વાગોઠ ગામના ફરદીન અલીમામદ સુમરા અને ઈરફાન હારૂન કેર તથા મોકરશી વાંઢના સલીમ ખાન મોકરશી નામના યુવકોએ જીતેન્દ્ર ચૌધરી ઊર્ફે પિન્ટુભાઈ નામના શખ્સને ગૂગલ પે તથા વચેટિયાઓ મારફતે રૂપિયા ચૂકવીને આ બોગસ લાયસન્સ બનાવ્યાં હતાં.

વાગાપધ્ધરના રતનજી સંગ્રામજી જાડેજા, અર્જુનસિંહ હરિસંગજી પઢિયાર, પ્રેમજી હાલુભા પઢિયાર અને નાની ધૂફીના જયદીપસિંહ જગમાલજી જાડેજાએ વાગાપધ્ધર ગામના વચેટિયા મહિપતસિંહ ઊર્ફે મુરુભા લખિયારજી જાડેજા પાસે લાયસન્સ બનાવડાવેલાં. મોકરશી વાંઢના કાદર ખાન મોકરશી અને ઈમરાન ઓસમાણ ખોડે મોકરશી વાંઢ રહેતા વચેટિયા સલીમ ખાન પાસે લાયસન્સ બનાવડાવ્યાં હતાં.

એસઓજીએ પિન્ટુભાઈ અને તપાસમાં ખૂલે તે તમામ શખ્સો વિરુધ્ધ અંગત આર્થિક ફાયદો મેળવવા ખાતર પોતે અધિકૃત ના હોવા છતાં ભુજ RTOની બોગસ ઈલેક્ટ્રોનિક સહી કરીને ગેરકાયદેસર રીતે કોમ્પ્યુટર સહિતના ઈલેક્ટ્રોનિક ઉપકરણોનો ઉપયોગ કરી બોગસ ડ્રાઈવીંગ લાયસન્સ ઈસ્યૂ બનાવવા સબબ વાયોર પોલીસ મથકે સરકાર તરફે ફોજદારી ફરિયાદ નોંધાવી છે. જે યુવાનોને બોગસ લાયસન્સ ઈસ્યૂ થયાં છે તેમને ફરિયાદમાં સાક્ષી બનાવાયાં છે. પોલીસ ઈન્સ્પેક્ટર કુલદીપ ગઢવીએ તપાસ હાથ ધરી છે.