ચાર આરોપીને માંડવીના જખણિયા ગામની વાડીમાંથી ઝડપી લેવાયાં છે.

બે પુત્રોનો પિતા એવો સુરેશ કટુઆ ચોથી મેના રોજ જમીને ‘મજૂરીએ જાવ છું’ કહીને બપોરે ત્રણ વાગ્યે ઘરેથી નીકળ્યો હતો. બીજા દિવસે પાછો ના આવતાં પરિવારજનોએ શોધખોળ શરૂ કરેલી. શોધખોળ દરમિયાન સુરેશના નાના ભાઈ હરેશને જાણવા મળ્યું હતું કે તે દિવસે સાંજે સુરેશ ગામના મહાદેવ ચૌધરીની વાડીએ ચોથા ભાગમાં કપાસની ખેતીનું નક્કી કરનાર સજ્જનસિંહ હરબંસસિંગ રાયશીખ (રહે. મૂળ અલવર, રાજસ્થાન) સાથે જોવા મળ્યો હતો.

ત્યારબાદ બેઉ જણ પગપાળા બસ સ્ટેશનથી મોડકા ચોકડી નજીક મહાદેવ ચૌધરીની વાડી તરફ જતા હતાં. રસ્તામાં ગામના બે યુવકો મોટર સાયકલ લઈને નીકળ્યાં તો તેમને ઊભાં રખાવી બેઉ જણે મોડકા ચોકડી સુધી લિફ્ટ લીધેલી.

સુરેશના પરિવારે મહાદેવ ચૌધરીની વાડીએ જઈ તપાસ કરતાં વાડીમાલિક મહાદેવ ચૌધરીએ જણાવ્યું ઘટસ્ફોટ કર્યો હતો કે ચોથી મેના રોજ સજ્જનસિંગ તેની પત્ની સાથે મળવા આવેલો અને વાડીમાં ચોથા ભાગમાં કપાસની ખેતીનું નક્કી કરેલું. અન્ય ચાર મજૂરોને પણ તેણે વાડીએ બોલાવ્યાં હતાં.

સજ્જનસિંગ તેનો ફોન પણ વાડીએ ભૂલી ગયેલો. બનાવ અંગે ૬ઠ્ઠી મેના રોજ હરેશે મોટો ભાઈ ગૂમ થયા અંગે કોઠારા પોલીસ મથકે ગૂમનોંધ લખાવેલી.

પોલીસ તપાસ ચાલું હતી તે દરમિયાન ૧૦ મેના રોજ સુરેશની મહાદેવ ચૌધરીની વાડી પાસે આવેલા પુલિયા નીચે દોઢ ફૂટ પાણી ભરેલા ખાડામાં ઊંધી હાલતમાં પડેલી લાશ મળી આવી હતી. પોલીસે અકસ્માત મૃત્યુની નોંધ પાડી કોહવાઈ ગયેલી લાશને જામનગરમાં પોસ્ટમોર્ટમ માટે મોકલી આપી હતી. બનાવ હત્યાનો હોવાની આશંકા સાથે સામાજિક સંગઠને બે દિવસ પૂર્વે કોઠારા નજીક ચક્કાજામ કરી ખૂનનો ગુનો નોંધી આરોપીઓ પકડવા રજૂઆત કરેલી.

સુરેશની હત્યા થઈ હોવાનું સ્પષ્ટ થયાં બાદ ગત મોડી રાત્રે કોઠારા પોલીસ મથકે હરેશે મોટા ભાઈની હત્યા બદલ સજ્જનસિંગ, તેની પત્ની આશા તેમજ તેની વાડીએ મજૂરી કામે આવેલા હરિયાણાના ફરીદાબાદના ચાર મજૂરો સહિત ૬ લોકો વિરુધ્ધ ફરિયાદ નોંધાવી હતી. નાસી છૂટેલો સજ્જનસિંગ અને અન્ય ત્રણ જણાં માંડવીના જખણિયાની વાડીમાં મજૂરી માટે રોકાયાં હોવાનું જાણવા મળતાં એલસીબીએ ચાર આરોપીને ત્યાંથી ઝડપી પાડ્યાં છે, બે આરોપી કિશોર વયના છે.

કોઠારાના પીએસઆઈ જે.જે. રાણાએ જણાવ્યું કે ચોથી મેના રોજ સુરેશનો સજ્જનસિંગ તથા તેના મજૂરો સાથે ઝઘડો થયેલો. સુરેશે તેમને ભૂંડી ગાળો ભાંડેલી અને ગામમાંથી બીજા માણસો બોલાવી લાવીને તેમને મારી નાખવાની ધમકી આપેલી. જેથી તેમણે ઉશ્કેરાઈને સુરેશને મારવા લેતાં સુરેશ નાસવા માંડ્યો હતો.

સુરેશના મૃતદેહ પાસે એક કમરપટ્ટો પડ્યો હતો. પોલીસનો શ્વાન કમરપટ્ટાની સ્મેલ પરથી સૂંઘતો સૂંઘતો છેક મહાદેવ ચૌધરીની વાડીમાં આવેલી પતરાંની ઓરડીએ પહોંચ્યો હતો. સૂત્રોએ જણાવ્યું કે મૃતક સુરેશ અને સજ્જનસિંગ બેઉ મિત્રો હતાં. સજ્જનસિંગ પાંચ વર્ષ અગાઉ પણ કોઠારાની વાડીમાં કામ કરતો હતો. બનાવના દિવસે ખાણી-પીણી કરવા સુરેશ વાડીએ ગયેલો તે સમયે ઝઘડો થયો હતો.