જો કે, પોલીસની ઝીણવટભરી તપાસમાં આર્મી-એરફોર્સના નામે તૈયાર કરાયેલાં ચલણ-સીલ બોગસ હોવાનો પર્દાફાશ થયો છે. સ્ટેટ મોનિટરીંગ સેલની ટીમે બાતમીના આધારે ગત મધરાત્રે બાર વાગ્યે પલસાણાના બાલેશ્વર ગામે હાઈવે પર આવેલી હોટેલ સહયોગ ખાતે પાર્ક કરેલી એક કન્ટેઈનર ટ્રક(HR 55 9774)ની તલાશી લીધી હતી. જો કે, કન્ટેઈનરના દરવાજા પર આર્મી-એરફૉર્સના સિક્કા સાથેનું સીલ હતું. પોલીસે ડ્રાઈવર ગોવિંદસિંહ મજબીસિંહ (ઉ.વ.33, રહે. અમૃતસર, પંજાબ)ની પૂછપરછ કરતાં તેણે પોલીસને જવાબ આપ્યો હતો કે, સાહેબ ટ્રકમાં ડિફેન્સનો શરાબ ભરેલો છે અને તે આ માલ ભુજ આર્મી-એરફૉર્સ સ્ટેશનમાં સપ્લાય કરવા જઈ રહ્યો છે. પોલીસે પૂરાવા માંગતા ગોવિંદસિંહે આર્મી-એરફોર્સના સિક્કાવાળા ડિલિવરી ચલણ બતાડ્યાં હતા. થોડીકવાર માટે તો પોલીસ અધિકારીઓ પણ મુંઝાઈ ગયાં હતા. જો કે, બાતમી પાક્કી હતી. તેથી ઝીણવટભરી તપાસ કરતાં સ્પષ્ટ થયું હતું કે, ડિલિવરી ચલણ અને કન્ટેનરને મરાયેલું સીલ વગેરે બૉગસ છે. પોલીસે સીલ તોડી ચેક કરતાં કન્ટેઈરમાંથી 56 લાખ રૂપિયાની કિંમતની 11412 નંગ વિદેશી શરાબની બોટલ મળી આવી હતી. પોલીસે ડ્રાઈવર ગોવિંદસિંહની ધરપકડ કરી છે. જો કે, કાર્યવાહી દરમિયાન ટ્રકનો ક્લિનર જીતેન્દ્ર ઊર્ફે બગ્ગા નાસી છૂટ્યો હતો. પ્રાથમિક પૂછપરછમાં ગોવિંદસિંહે કબૂલ્યું છે કે શરાબનો જથ્થો રાજેશ મલ્હોત્રા નામના શખ્સે મોકલ્યો હતો અને તેની ડિલિવરી રાહુલ નામનો શખ્સ લેવા આવવાનો હતો. શરાબનો આ જથ્થો ખરેખર ભુજ મોકલાઈ રહ્યો હતો કે બીજે ક્યાંક તે અંગે પોલીસે ઝીણવટભરી તપાસ હાથ ધરી છે. પોલીસે ડ્રાઈવર પાસેથી 34 હજારની રોકડ રકમ, 500 રૂપિયાની કિંમતનો મોબાઈલ અને 20 લાખ રૂપિયાની કિંમતની ટ્રક ગણી કુલ 77 લાખ રૂપિયાનો મુદ્દામાલ કબ્જે કર્યો છે. આરોપીઓ સામે પ્રોહિબિશન અને નકલી દસ્તાવેજ બનાવવા અંગે બે અલગ અલગ ગુના દાખલ કરાયાં છે.