કચ્છખબરડૉટકોમ, ભુજઃ વાગડની ધરા આજે સાંજે 3થી 4ની તીવ્રતાના ત્રણ કંપન સહિત કુલ પાંચ કંપનથી ધણધણી ઉઠી હતી. સાંજે 4.20 મિનિટે રાપરથી 15 કિલોમીટર દૂર પ્રાગપર હાઈવે નજીક 3ની તીવ્રતાનો ભૂકંપનો આંચકો નોંધાયો હતો. તેની 27 મિનિટ બાદ તેની નજીક વણોઈ પાસે કેન્દ્રબિંદુ ધરાવતો 4.1ની તીવ્રતાનો ભૂકંપ નોંધાયો હતો. તો, 21 મિનિટ બાદ ફરી આ જ કેન્દ્રબિંદુ નજીક 2.9ની તીવ્રતાનો ભૂકંપનો આંચકો નોંધાયો હતો. આમ, પોણો કલાકના અંતરમાં એક જ કેન્દ્રબિંદુ આસપાસ ત્રણથી ચારની તીવ્રતાના ત્રણ શ્રેણીબધ્ધ કંપન નોંધાયાં હતા. આ પૂર્વે, મધરાત્રે બે વાગ્યે દુધઈ નજીક 1 અને રાત્રે 4.22 મિનિટે ભચાઉ નજીક 1.5ની તીવ્રતાના હળવા આંચકા નોંધાયા હતા. ઉલ્લેખનીય છે કે, વર્તમાન વર્ષે કચ્છમાં 4 કે તેથી ઉપરની તીવ્રતાના અત્યારસુધીમાં કુલ 6 આંચકા નોંધાયાં છે. છમાંથી પાંચ કંપન વાગડમાં નોંધાયેલાં છે. રાપરમાં અગાઉ 16 જૂન અને 5 માર્ચે આ જ કેન્દ્રબિંદુ આસપાસ 4ની તીવ્રતાના બે કંપન નોંધાયા હતા.
Share it on
|