કચ્છખબરડૉટકોમ, ભુજઃ ગેરકાયદેસર દેશી બંદૂક સાથે ઝડપાવાના નવ વર્ષ જૂના એક કેસમાં ભુજના ફર્સ્ટ એડિશનલ જ્યુડિસિયલ મેજિસ્ટ્રેટ યુ.એસ.પરમારે આરોપીને આર્મ્સ એક્ટ હેઠળ દોષી ઠેરવી બે વર્ષની કેદની અને 1 હજાર રૂપિયાનો દંડ ફટકાર્યો છે. 11 એપ્રિલ 2009નાં રોજ ભુજ તાલુકાના રતીયા ગામે હનુમાનજીના મંદિર તરફ જતા રસ્તા પરથી પોલીસે અબ્દુલ ગફૂર હસન ભુરીયા (રહે. રતીયા, ભુજ)ને તેના કબ્જામાં રહેલી ટૂંકી નાળવાળી દેશી બંદૂક (કિંમત રૂપિયા 1 હજાર) સાથે ઝડપી પાડ્યો હતો. ભુજ તાલુકા પોલીસે આરોપી સામે જિલ્લા મેજિસ્ટ્રેટના હથિયારબંધીના જાહેરનામાના ભંગ તેમજ આર્મ્સ એક્ટની કલમ 25 (1) અને બીપી એક્ટ કલમ 135 હેઠળ ફરિયાદ નોંધી હતી. આ કેસમાં મદદનીશ સરકારી વકીલ અરવિંદ બી. તડવીની દલીલો અને આરોપી સામેના પૂરાવાને અનુલક્ષીને ફર્સ્ટ એડિશનલ જ્યુડિસિયલ મેજિસ્ટ્રેટ યુ.એસ.પરમારે આરોપીને આર્મ્સ એક્ટ હેઠળ દોષી ઠેરવી બે વર્ષની સાદી કેદની સજા કરવા સાથે 1 હજાર રૂપિયાનો દંડ ફટકાર્યો છે. તો, બી.પી.એક્ટ હેઠળ કૉર્ટે આરોપીને ચાર માસની સાદી કેદની સજા ફટકારી છે.
Share it on
|