કચ્છખબરડૉટકોમ, ગાંધીધામઃ ભચાઉ તાલુકાના સુખપર ગામના વાડીવિસ્તારમાંથી પોલીસે સ્વિફ્ટ કારમાંથી 6.25 લાખ રૂપિયાનો વિદેશી શરાબ અને બિયરના જથ્થા સાથે નાની ચીરઈના બૂટલેગરની ધરપકડ કરી છે. દુધઈ પોલીસે ગત મધરાત્રે બે વાગ્યે સુખપર ગામના વાડી વિસ્તારમાં પસાર થઈ રહેલી સ્વિફ્ટ કાર અટકાવી તલાશી લીધી હતી. કારમાંથી પોલીસને શરાબના 180 એમએલના ક્વાર્ટર નંગ 5424 (કિંમત 5 લાખ 42 હજાર 400 રૂપિયા), 750 એમએલની બોટલ નંગ 228 (કિંમત 68 હજાર 400 રૂપિયા) અને કિંગફિશર બીયરના 500 એમએલના 144 ટીન (કિંમત 14 હજાર 400 રૂપિયા) મળી કુલ 6 લાખ 25 હજાર 200 રૂપિયાના શરાબનો જથ્થો મળી આવ્યો હતો. પોલીસે કારમાં રહેલા કરીમમામદ પરીટ (રહે. નાની ચીરઈ, ભચાઉ)ની કાર અને 3 મોબાઈલ સાથે ધરપકડ કરી છે. બનાવ સંદર્ભે દુધઈ પોલીસ મથકના એએસઆઈ પરીક્ષિતસિંહ જાડેજાએ ફરિયાદ નોંધાવી છે.
Share it on
|