ઉચ્ચ અધિકરીઓની તાકીદ સંદર્ભે ભચાઉના ઈન્ચાર્જ પીઆઈ આર.એમ. ઝાલા સ્ટાફ સાથે પેટ્રોલીંગ કરી રહ્યા હતા. દરમિયાન હેડ કોન્સ્ટેબલ હરદેવસિંહ સરવૈયાને એચઆર 63 બી 3025 નંબરના ટ્રેલરમાં બાસમતી ચોખાની બોરીઓ નીચે છૂપાવીને અંગ્રેજી શરાબ ભરેલું એક ટ્રેલર સામખિયાળીથી ગાંધીધામ તરફ જઈ રહ્યું હોવાની બાતમી મળી હતી. પોલીસે પરોઢે આરટીઓ ચેકપોસ્ટ પાસે વૉચ રાખી આ ટ્રેલરને અટકાવી તલાશી લેતાં તેમાંથી 8.49 લાખની કિંમતના અંગ્રેજી શરાબની 2304 બોટલ મળી આવી હતી. ટ્રેલરમાંથી પોલીસે 10 લાખ 96 હજાર 875 રૂપિયાની કિંમતના બાસમતી ચોખાની 675 બોરી પણ જપ્ત કરી છે. પોલીસે ટ્રેલરમાં સવાર હરિયાણાના ડ્રાઈવર નીતિન રોહિતાસ જાટ અને ક્લિનર મોહીત ઊર્ફે સુમિત ઊર્ફે ગુન્ના રામચંદ્ર જાટની ધરપકડ કરી છે. આરોપીઓએ પ્રાથમિક પૂછતાછમાં જણાવ્યું કે, રોહતકના દિપક રાજકુમાર જાટ નામના શખ્સની સૂચનાથી તેમણે સોનીપતના ગોડાઉનમાંથી આ શરાબ ટ્રેલરમાં ભર્યો હતો અને શરાબનો જથ્થો ગાંધીધામમાં અનિલ શર્મા (પંડિત) નામના શખ્સને પહોંચાડવાનો હતો. પોલીસે ડ્રાઈવર-ક્લિનર ઉપરાંત માલ આપનાર અને લેવા આવનારાં બંને શખ્સો સામે પણ ફરિયાદ નોંધી છે. દરોડામાં પોલીસે શરાબ અને બાસમતી ચોખા ઉપરાંત 5500ની કિંમતના બે મોબાઈલ ફોન તેમજ 15 લાખની કિંમતના ટ્રેલર મળી કુલ 34.51 લાખનો મુદ્દામાલ જપ્ત કર્યો છે. આ કામગીરીમાં ઈન્ચાર્જ પીઆઈ આર.એમ.ઝાલા, હેડ કોન્સ્ટેબલ હરદેવસિંહ સરવૈયા, ભુપતસિંહ રાઠોડ, ગેલાભાઈ શુક્લ, કોન્સ્ટેબલ રાજેન્દ્ર પરમાર વગેરે જોડાયાં હતા.